Navenda Nûçeyan- Serokê Herêma Kurdistanê Nêçîrvan Barzanî îro dê bi partî û alîyên sîyasî yên Kurdistanê re bicive û rewş û pêşhatên herî dawî yên li Iraqê û yekhelwêstîya Kurdan di rewşa niha de gotûbêj bike. Serokomarê Iraqê Berhem Salih, Serokwezîrê Kurdistanê Mesrûr Barzanî û Seroka Parlamentoya Kurdistanê, Rêwaz Fayeq jî di civînê de amade dibin.

Îro Sêşemê, Serokê Herêma Kurdistanê Nêçîrvan Barzanî li gel Serokatiya Encûmena Wezîran û Serokatîya Parlamentoya Kurdistanê dicive, û dê pêşhatên dawîyê binirxînin. Piştre Nêçîrvan Barzanî dê li gel alîyên sîyasî yên Herêma Kurdistanê bicive.

Di vê civînê de, Serokwezîrê Herêma Kurdistanê, Mesrûr Barzanî, Seroka Parlamentoya Kurdistanê, Rêwas Fayeq û herwiha Serokomarê Iraqê Berhem Salih jî beşdar dibin.

Weke ku berê hatibû ragihandin, Nêçîrvan Barzanî dixwaze li hember vê rewşa ku li Iraqê çêbûye, helwest û nerîna alîyên sîyasî yên Kurdistanî bike yek.

Herwiha di civînê de dê tekez li ser mafê gelê Kurdistanê di Iraqê de bê kirin, bi tayebetî ku niha behsa destkarîkirina destûra Iraqê heye.

Kurd tekez dikin ku divê mafên gelê Kurdistanê di destûrê de parastî bin, wê demê ew rêgir nabin li ber destkarîkirin û guhertin hin bendên destûrê.

Çavkanî: Rûdaw