Navenda Nûçeyan- Nûnera Neteweyên Yekbûyî li Iraqê, amaje bi rûbirûbûn, alozî û pevçûnên navbera hêzên ewlehîyê yên Iraqê û xwepêşanderan dike û dibêje, tundûtîjî, tenê tundûtîjîyeke zêdetir bi xwe re tîne, û pêwîst e xwepêşandanên aştîyane werin parastin.

Jeanine Hennis-Plasschaert hişyarî da û got, nabe hêrsbûna xelkê kêm bihê dîtin û bi şaşî nirxandin bo wê hêrsbûnê bê kirin.

Ew zêdetirî 11 rojan e ku xwepêşandanên nerazîbûnê li dijî hikûmetê, li bajarên Bexda, Besra, Mîsan, Zîqar, Kerbela, Necef, Dîwaniye, Wasit, Babil û Musenayê berdewam in.

Li gor Komîsyona Mafên Mirovan a Iraqê, ji destpêka xwepêşandanan ve heta niha nêzîkî 300 kes hatine kuştin û zêdetir ji 12 hezar kesan jî birîndar bûne.

Tevî berdewambûna xwepêşandanan, lê rewş li Bexdayê û bajarên din ên başûrê Iraqê hinek asayî bûye û ji ber wê yekê jî hikûmetê astengiyên li ber tora înternetê rakirin.

Li alîyekî din hêzên ewlekarîyê li Bexdayê, ji bo tundtirkirina parastina navçeya Kesk a Bexdayê, pira Ehrar jî li ser hatin û çûnê girtin.

Ew yek di demekê de ye, ku ji çend roj beriya niha ve pirsên Cumhurî û Sînek ji alîyê xwepêşanderên nerazî ve hatine girtin.

Xwepêşanderên nerazî yên Iraqî ew çend roj in ku hewl didin derbasî nav navçeya Kesk a Bexdayê bibin û dest bi ser sazî û dezgehên hikûmetê de bigirin.

Çavkanî: Rûdaw