Merkezê Xeberan- Partîya Azadîya Kurdistanî (PAK) seba Qanûnê Bingehînî yo Newe yê Sûrîye veng da partîyanê Rojavayî: Ganî bi Mitabaqatê heme partîyanê Rojavayê Kurdistanî heyetêka temsîlkare beşdarê kombîyayîşê Qanûnê Bingehîn yo newe yê Sûrîye bibo.

Peyamê Buroya Çapemenî û Têkilî ya PAKî de wina ame vatene:

Roja 30ê (2019) Teşrîna Verêne de, seba Qnunê Bingehînî yê Sûrîye pêvînayîşî dest pêkenê.

Verê nê pêvînayîşan Rojavayê Kurdistanî de prosesêko têmîyanbîyaye virazîya  û planêka mîyandewletan erzîya fealîyet.

Dewleta Tirkîya 9ê na menge de bi desturê Donald Trumpî Rojavayê Kurdistanî rê hêriş kerd. Badê cû Amerika reyde Mutabaqatê Anqara ame îmza kerdene, dima ra mabênê Tirkîya û Rûsya de mutabaqatê Soçî virazîya. Bi no qayde Rojavayê Kurdistanî de eyarê balansî dîya kurdan.

Badê mutabaqatê Anqara û Soçî, Amerîka kena ke HSD reyde têkilîya xo bidomno, seba pawitişê Kurdan beyanatan dana û no zî nîşanê xapînayîşî dano. Seba ke wa Kurdî Rojavayê Kurdistanî de statuyêk qezenc nêkerî, Kurdî nika amê astengkerdene. La  no nêno manaya ke Kurdan ra vîyartê.

Kongreya Amerîka de seba hêrîşê ke Kurdan rê benê reaksîyon nîşan dîya, hetkarîya Ewropa û vateyê Putinî ke vatbi' wa çarçeweya Şamî reyde dîyalogî de heq û huquqê Kurdan bêrê naskerdiş, nê çîyî pêro û nê destegî zaf muhîm ê. Gere Kurdî na çerçewe de gamanê xo bierzî.

Eke ti seha de qewetin î, ti masa de gamêk vernî de yî. Tirkîya naye baş zana û kena ke vernîya pêvînayîşê Qanunê bingehînî yê Sûrîye de bi desto xurt ronişa. Xora meqsedê hêrişê Tirkîya yê ser Rojavayê Kurdistanî no bi.

Her çiqas zî nê çîyê negatîfî estbê zî, Kurdî eşkenî nê wezîyetî ra zî îstîfade bikî, biaçarnê avantajêk û Qanûnê Bingehînî yê Surîye de, bi heqanê xo yê netewî, demokratîk û kolektîfan ca bigîrî.

Wezîyetê nikayînî de nameyê Kurdan ser o tena 2 endamê ENKS nê pêvînayîşan de ca gênê. Nameyê TEVDEMî, PYDî ser o temsîlkarêk çin o.  No wazîyet rîyê ambargoya ke Tirkîya  PYD ser o ronaya ra bîyo. La no wazîyet meseleyî hîna kerdî giran û têmîyan.

Ewro her çiqas mutabaqatê Anqara-Soçì bîyo zî, heta ke Qanûnê Bingehînî yê Surîye de Kurdî cayê xo nêgîrê mesela çare nêbena. Heme Kurdî gere waştiş bikê ke wa Netewê Yewbîyayî dest bierzo na mesela û hêzê ke nika Rojavayê Kurdistanî de ca bîyê wa uca ra vejîyê.

Ewro ra tepîya, seba ke pêvînayîşê  Qanûnê Bingehînî yê Newî Yê Sûrîye de, dîplomasî de û sîyaset de,Kurdî bieşkê heqanê xo yê kolektîf yê netewî, demokratîk bidê qebûlkerdiş, gama yewine na ya ke TEVDEM, ENKS û heme partîyê Kurdan yê  Rojavayê Kurdistanî mutabaqatêkêko sîyasî, eskerî, aborî, dîplomasî û îdarî mîyanê xo de ronê.

Eger partîyê Kurdan mutabaqatê xo bîyarê ca û pîya têbigêrê do rayîr abibo ke, îradeyê heme partîyê Kurdan pêvînayîşê Qanûnê Bingehînî yo newe yê Sûrîyeye de bêro temsîlkerdiş. No zî seba qezenckerdişê heqanê kolektîf,netewî û demokratîk, seba statuyêka sîyasî do destê Kurdan xurtêr biko. 

Eger partîyê Kurdan mitabaqatêko xo bîyarê ca û yewîya xo ronê, do hetkarî û yewitîya  heme Kurdanê dinya zî xurtêr bikê û do bi taybetî welatanê Ewropa de xebata sivîl û komelkî û dîplomasîyêka xurt ya dîyaspora ya Kurdan weşe bikê. 

Ewro seba ronayîşê Mitabaqatê partîyanê Rojavayê Kurdistanî, seba Rojavayê Kurdistanî bi rêyê aştîyane, sîyasî û  dîplomasî qezenckerdişê heqanê kolektîf, milî demokartîk yê miletê Kurd, wazîfeyêko esasî û barêko giran eşto milê Birêz Serek Mesûd Barzanî û Parlamento û Hikûmetê Herêma Kurdistanî ser; milê heme partîyanê sîyasî û dezgehê sivîl yê  her çar perçeyanê Kurdistanî û dinya ser. 

Bi taybetî zî barêko giran û  tarîxî milê Birêz Serek Mesud Barzanî ser o yo. Ewro eger mercîyêk, şexsîyeto ke hetê heme partîyanê Rojavayê Kurdistanî ra bêro qebûlkerdene esto, o zî Birêz Serok Mesud Barzanî yo. Na rastîye eslê xo de seba heme Kurdan sey şansêk a zî. Ma pêşnîyaz kenê ke Birêz Serek Mesud Barzanî seba awankerdişê mitabaqetêko newe yê mabênê partîyanê Rojavayê Kurdistanî de însîyatîfêk bigîro. Ma pêşnîyaz kenî ke bi serekîya Birêz Serek Mesud Barzanî, temsîlkarê her çar perçeyanê Kurdistanî û temsîlkarê Kurdanê Dinya Merkezê Koorînasyonî yê Netewî bêro ronayene. Merkezê Koorînasyonî yê Netewî  seba awankerdena Mitabaqatê partîyanê Rojavayê Kurdistanî û seba dîplomasîyêka hempare ya xurt gere ca de gamanê muhîman bierzo.

Seba ke Kurdî bieşkê heqanê xo yê ke estê bipawê, seba ke şikyayîşê neweyî nêbê, seba ke bieşkê qezencanê kolektif, milî, demokratîk bipawê, bingehê esasî û gama yewine ya ke qeder û sibarojê miletê Kurd bîyo, no yo ke, heme partîyê Rojavayê Kurdistanî bieşkê mîyanê xo de Mitabaqatê xo yê netewî awan bikê.

30.12.2019 

Buroya Çapemenî û Têkilî ya PAKî